quasi tacai soto el promontorio
a pico sul mar, rocioso spiovente;
passar le quatro o cinque casete
(deposito de pescadori),
tra sassi lime, i pìe in acqua e scoi
(le scarpe scalcagnade in man);
robe de fioi.

Ogì, de sta roba,
non ghe xe più gnente.
Cementà dapertuto;
spiagia, porticiolo
(con barche de tuti i tipi),
e ristoranti eleganti,
e passegio a liston.
Zo infondo, alineà con la grota
un comodo squero e po’,
costruì altro molo longo
e scoiera esterna frangifluti.

(el moleto de Grignan
el ghe iera zà,
con sul fondo però,
un somergibile tascabile afondà)
Mi quindise ani e Gil tredise
(Vigilio de Flaviis
Contino de Maniago),
ai primi de Magio del ‘45,
curiosi, semo ‘ndai
a vardar se ghe iera qualcosa
de magnar n’te la grota.
No jota, ma in fondo,
posade su una nichia,
diverse botigliete de vetro
ben in vista.
Mi, più grande de lu iero davanti
e stavo quasi per cior una,
ma lù de drio el me tratien la man:
sta fermo, non tocar,
poderia esser nitroglicerina!

Ga bastà,
semo tornai ìndrio e filai via. Gil da tanto el xe passà a miglior vita ; grato, non lo go smenticà mai, amici fin la fine; lu pò, de omo “Diretor de Machina” e pensionà al Lloyd de Navigazion. Se ve raconto sto fato xe perché, strano ma vero, per curar el mio vecio cuor, me meto sul peto, ordine del dotor, un cerotin a la nitroglicerina. Alora go dei dubi e penso che, sta cura esplosiva. forsi iera meo farla prima!