Toscana mia mama. (Camaiorese)
Papà de nascita Pugliese,
nol saveva una parola de barese,
ma assai ben e no poco
el Triestin patoco.
Son nato a Scoglieto,
davanti l’Università nova
e sentì parlar sempre in dialeto
in casa e fora.
Prima de la guera
stavimo in Ponziana.

La mularia zogava solo in strada
e podè creder
come che se parlava;
sempre e solo in dialeto streto.
Dalmato el mio secondo Nono,
de Sebenico (per tuti Totò!)
Mia Nona (vedova de guera)

toscana, come mia Mama.
Assai poco gò studià
e a stento in verità;
el maestro, bontà sua!...
inteligente el xe, ma!
Scarso d’ingegno
e de meningi lento,
fadigà gò non poco
ma, finì l’impegno!
Imbarcà de ufizial
“all’Italia s.p.Az.”, gò navigà
e senza pensarghe tanto,
nè poco nè...ai guai,
molado go tuto in bando;
ierimo giovani e inamorai!
Sposi felici per la vita in S.Antonio vecio;

pensado gà ben el destin,
de portarmela via.
El bel sogno xe finì ‘ssai presto,
lassandome l’Amor
el ricordo,
e nostra fia.
Non me son dà per vinto,
non gò molado;
per ela.. go fato volontariato
e risalì la corente.
Dopo diese ani,
senza dimentigar niente,
me son risposà.
A l’ombra de San Giusto e del Melon vivemo; de casa sentimo el Campanon,
e de l’alto del cole de S.Vito,

“Miramar” e tuto el nostro bel golfo vedemo;
anzi a ela ghe devo contar, spiegar,
perchè la xe ‘ssai bela, generosa,
sposa amorosa, e brava de cantar,
ma ... la luce dei sui oci, purtropo riposa.
Ma, strano come xe la gente;
co parlo in lingua, “de fin”,
fieri del nostro bel dialeto, i me fà:
ma lei sior... “non la xe miga Triestin! ?