PREFAZIONE

Iera un San Valentin de tanti ani fa
e imbacucadi noi, strenti de zima,
andavimo per un troso imbigolà
fra do mureti a seco
piere sbusade e bianche
e ne pareva d’esser soli al mondo.
Coi sbrisi ragi del sol la neve se disfava
a joze zò dei rami.....
nissun altro rumor.
Passi ovatadi i nostri,
su quel fiatin de neve che restava.
E là, in tuto quel zito,
fazendome coragio
ghe go dito
el ben che ghe volevo.
El stesso ben de ogi,
se anca stamatina
San Valentin sveia do veci
che ancora i sa trovar parole nove.