I ero anca mi, quel dì,
vestì de ‘Balila,
domenica matina
del 18 settembre ‘38
giorno del mio compleano, là de soto;
o quasi soto l’arengario
in Piaza Granda,
una costruzion simile
a la prua de una nave
in fora del balcon del sindaco.

Bandiere tricolori sabaude e non
e labari ovunque.
De fianco l’arengo i fasci litori;
tuto lindo, tuto bianco candido.
Trieste, giardini, strade, case, tuto pulì;
lucido dapertuto.

Ragiante, bel, come non più mai!
Mio papà certo voleva vederlo,
e sentir el discorso; unica ocasion.
Mi me ricordo ben poco
el discorso del Duce;
però che iero fracà
in un canton del palazo cheba,
drio mio papà.

Tanta la gente, stipada, siepada,
ordinada e altra meno!
Sentivo a malapena frasi lontane,
come un’eco,
la sua vose energica,
scandida,
virile,
stentorea,
condanante vaghi nemici de la Patria,
de l’Italia nostra;
quei de fora,
ma ‘ssai più, e più pericolosi
quei de drento.

Mha! pensavo ingenuamente tra de mi:
se tuta sta gente la ghe xe qua,
del vero ghe sarà!
Però quel che me dispiaxeva assai de più,
de non esser restà a casa
con mia mama, e i mii amichetti
a festegiar el compleano
con la scodela de late e ciocolata
e biscotti cusinai sul fogoler.

Ben bon: per farla breve posso dir
che xe ‘ndà proprio tuto ben quel dì;
ma, dopo qualche tempo non più bon, cussi!
Ogi che de ani
ghe ne go diese volte de più
e che qualcosa capisso,
vivemo tra afani, e ingani,
sempre presenti,
come in quei tempi lontani
Xe proprio vero, xe noto:
nemici d’Italia in fati i ghe xe,
come quel giorno del ‘38.

Sì, quei de fora, se sà!
Ma più, più e ‘ssai grave,
quei de drento ;
gaveva ragion Lu?

Nevio Mastrociani Bertola
Trieste, 20 ottobre 2011